ЭРГИЖИРЭЭН БОЛГАШ АВАРИЙЛИГ БАЖЫҢНАРНЫ БУЗАР ПРОГРАММАНЫҢ ЧУРУМУНУҢ ДУГАЙЫНДА

13 февраля 2023

Городское хозяйство

Бо бажыңнарга моон соңгаар амыдыраар арга чок. Ону бузар деп шиитпирни ведомстволар аразында тускай комиссия үндүрген. Бажыңның чурттакчыларын 2013-2022 чылдар дургузунда чаа оран-саваже көжүрер республика программазынче киирген. Амгы үеде эргижирээн бажыңнарны бузар ажылдар уламчылавышаан. Квартиларарның хууда ээлерин чаа оран-саваже чайлады көжүрүп турар. Ындыг турбуже, ээн арткан эрги бажыңнарны кезек хамаатыларның кара туразында ээлеп, чурттап эгелээр таварылгалар нептереп турар. «Эрги квартираларның ээлери дүлгүүрлерин дөргүл-төрелдеринге азы таныыр кижилеринге дамчыдып берип турар. Кызыл хоорайның чагыргазы аварийлиг байдалга келген бажыңны бузар дээрзин каш удаа сагындырып, оран-саваны көрдүнген хуусаа дургузунда хостаар дугайын бижээн тайылбыр бижиктерни азып турган. Чурттакчылар ону тоомчага албас. Найысылалдың чагыргазының ажылдакчылары көрүп турда-ла чарлалдарны дүжүрүп, ора соп турар таварылгалар эвээш эвес», - деп экономика болгаш өнчү-хөреңги Департаментизи дыңнатты. Чаа бажыңнарже көже берген хамаатылар эрги квартираларының дүлгүүрлерин архитектура, хоорай тудуу болгаш өнчү-хөреңги Департаментизинге дарый дужаарын Кызылдың чагыргазы сагындырып турар. Бо негелдени күүседир болза, мындыг чөрүлдээлиг байдалдар тургустунмас болур. Эрги бажыңнарга амыдыраары кижилерниң амы-тынынга онза айыылдыг. Аварийлиг оран-савадан хамаатыларны көжүрер программаны хоорай чагыргазы ТР-ниң прокуратуразының негелдези ёзугаар күүседип турар. Бо бажыңнарга түр када безин амыдыраары хоруглуг. Оларны хоойлу-дүрүм аайы-биле бузар ужурлуг. Амгы үеде эрги бажыңнарны бузар программаның бирги чадазы адакталган. Соонда ажылдар күүсеттинген деп бадыткалды бижээн илеткел бижикти РФ-тиң Чазаанче чорудар. Бо бүгү ажылдарны үе-шаанда чорудары чугула. Оон башка дараазында чылдарда программага улуг бергедээшкиннер тургустунуп, эрги бажыңнардан хамаатыларны чайлады көжүрери нарыыдап болур. Чурттакчыларның эрге-ажыын хажытпайн, дарый чаа оран-сава-биле хандырары – кол сорулга. Бузар ужурлуг бажыңнарда чөпшээрел чок чурттап турар кижилер программаның үе-шаанда күүседилгезинге шаптараазыннарны тургузуп турар. Сагындырып каалы, федералдыг программаның негелдези ёзугаар эргижирээн бажыңнарга чурттаары хоруглуг. Келир 2023 чылдың февраль айга чедир 17 аварийлиг бажыңнарны бузары көрдүнген. Ол дээрге Джерзинская, Лопсанчап, Баянкольская, Сумонная, Кочетов, Кызыл партизаннар, Интернациональная, Складская, Механизация, Заводская кудумчуларында эрги бажыңнар.